Elvira Wegmann, ch’è pertutgada da la povradad, ha pudì far diever d'in bon ch'il servetsch social da sia vischnanca da domicil ha concedì ad ella ed ha raquintà sia istorgia. Dapi sia diagnosa da cancer avant tschintg onns èn sias entradas memia bassas per pudair pajar ils custs da viver che creschan ad in crescher.
Sco manischunza d'in bus da scola per uffants cun impediments è ella pajada per ura. La lavur sco chauffeura è tenor la tgiradra d'animals emprendida ed ustiera cun furmaziun correspundenta ideala en sia situaziun actuala: «Jau na stoss betg seser memia ditg ed hai adina puspè pausas pli lungas – quai supporta mes corp.» Da manar in restaurant sco pli baud n'è ozendi betg pli pussaivel per ella.
En il pensum parzial sco chauffeura da professiun gudogna la dunna da 58 onns strusch avunda per cuvrir ils custs da viver auts en Svizra. Grazia ad ina buna purziun pragmatissem e persunas servetschaivlas ha ella dumagnà da s'adattar a la nova situaziun. Il sustegn da l'acziun «2 x Nadal» è ina distgargia bainvegnida per ses budget da famiglia.